ماذا تعنى كلمة chat bot

في أبريل 2016، فيسبوك قال ان الماسنجر والواتس آب بيتبعت عليهم 60 مليار مسدج يوميا، في الوقت ده كان عدد اللي بيستخدموا الماسنجر 700 مليون يوزر..

انهاردة 1 مليار واحد بيستخدم أبلكيشن الماسنجر، تخيل كام مسدج بتتبعت يوميا عليه!!

في نفس المؤتمر ده الفيسبوك أعلن عن حاجة اسمها Bots، واللي قدمها على أنها طريقة بسيطة وسريعة ومباشرة للتعامل مع البيزنسز المختلفة! " https://goo.gl/IHDnHo "

الشات بوت هو سيستم للرد الآلي بيختلف شكله حسب طبيعة الوظيفة اللي هيعملها، يعني ممكن يبقى بووت بيبعتلك كل يوم الصبح الأخبار الجديدة الساعة 7 الصبح أو بتسأله عن أحسن عروض الموبايلات في السوق أو أحسن العروض في قنادق شرم الشيخ وانت رايح تصيف وممكن يحجزلك كمان أو كمان يقدر يبعتلك نصايح كل يوم في وقت معين عن تمارين للجيم و أحسن أكل للدايت أو ممكن كمان يبقى مجرد بووت كل اليوم الصبح بيقول الساعة 7 الصبح الجو اخباره ايه انهاردة :D !

أحلى حاجة في الشات بووت انه بيتكلم معاك في اوقات كتير كأنه بني آدم طبيعي، لو مش فاهم حاجة بيقولك وضح اكتر، وكل ما بتتكلم معاه اكتر كل ما بيفهمك وبيبقى أذكى وبيقدر يجاوبك على الليانت عايزه أحسن وأسرع..

فمثلا اول مرة تتكلم معاه ويقولك اسمك ايه، هتقوله تكنولوبيا، مش هيرجع يسألك تاني يقولك اسم ايه في المرة اللي بعدها لما تيجي تكلمه تاني، بالعكس لما تكلمه هيقولك ازيك يا تكنولوبيا :D !

فيسبوك نزلت للديفيلوبرز منصتها لتطوير وتكوين البوتات Wit.ai (بيشتغل عليها 35 ألف ديفيبوبر) وطبعا مايكروسوفت مكدبتش خبر ونزلت هي كمان منصتها لتطوير البوتات Microsoft Bot Framework (شغال عليها 45 ألف ديفيلوبر)، وجوجل هي كمان نزلت بمنصتها API.ai (واللي شغال عليها 60 ألف ديفيلوبر) !

الشات بووتس لسا مخدتش حقها في مصر أوي، بس حاليا فيه شوية Chatbots عنب ممكن تستفيد منها كتييير جدا وتبدأ تستخدمها حالا سواء مصرية أو عالمية:

1. بووت Elves - Your Personal Little Helper :
البووت ده مصري وتقدر تسأله عن أي حاجة في الدنيا، كأنك بظبط بتكلم جوجل :D ( بتكتبله بالانجليزي)

2. بووت Neomy:
البووت ده جامد جدا ممكن تسأله عن أسعار العملات وتحويلاتها لأي عملات تانية، ويقولك أحسن وقت تحول فيه الفلوس من بلد لبلد حسب أحسن سعر للعملة :O

3. بووت GoalBot:
البوت ده بيخليك تحدد 3 أهداف تشتغلهم عليهم طول الشهر ويتابعك كل يوم ويحفظك عشان تحققهم !

4. بووت Hi Poncho :
البووت ده لذيذ جدا بيقولك كل يوم الصبح اخبار الجو ايه انهاردة ويقولك تلبس تقيل ولا مش مستاهلة :D

5. بووت Unicorn Bay :
البووت ده مفيد ليك جدا لو انت مبتحب تتابع البورصة العالمية، وهيبقى كل اللي عليك تكتب اسم السهم اللي حابب تتابعه

6. بووت TabhkaBot- طبخة بوت :
البوت ده بيقترح الطبخات الجديدة ولو سألته على طبخة معينة يقولك طريقة عمايلها

دول شوية بوتات خفيفة كدا ممكن تجربوها وقريب هنزلكم مجموعة كبيرة جدا جديدة من البوتات هتخلي حياتكم أسهل :D

من طرف : تكنولوبيا